Ido-renkontro 2008

Estimata adheranti dil linguo internaciona Ido!

Per ico ni ankorfoye kordiale invitas omna membri dil Uniono por la Linguo Internaciona Ido (ULI) e dil Germana Ido-Societo (GIS) ed omna interesemi ad Internaciona Ido-renkontro 2008.
L'Internaciona Ido-renkontro eventos dum la tempo inter la 22ma til la 26ma di agosto 2008 en la Silvio-Gesell-Kunveneyo Wuppertal-Neviges (Germania).

L'adreso dil kunveneyo esas:

Silvio Gesell Tagungsstätte
Schanzenweg 86
D-42111 Wuppertal
Germania

Interreto: http://caterconvent.com/blog/

Pro ke la propietero di la kunveneyo, la Humanekonomiala Partiso (olima Liber-Sociala Uniono)depos kelka yari sustenas Ido la direktantaro dil GIS decidis propozar a l'ULI aranjar l'Internaciona Ido-renkontro ibe dum la supre mencionita tempo e la DK di ULI aprobis ica propozo.
Kadre dil internaciona renkontro anke eventos la yarchefkunveno dil Germana Ido-Societo kun novelekto dil direktantaro.

Do, kara gesamideani ed interesemi, voluntez nombroze projetar ed anuncar vua partopreno por pruvar, ke l'Ido-movemento esas vivanta e konseque meritas la susteno latere dil Humanekonomiala Partiso anke future.
Voluntez samtempe anke uzar l'okaziono renkontrar e babilar kun altra gesamideani e diskutar pri diversa importanta temi koncerne l'Ido-movemento e tale praktikar nia komuna linguo Ido.

Me kordialege pregas omnu, qua deziras asistar l'Internaciona Ido-renkontro en Wuppertal-Neviges imprimar e plenigar l'anuncformulario e retrosendar ol a la en la formulario mencionita postala od e-postala adreso maxim tarde til la 30ma di mayo 2008.

Por partoprenanunci, qui arivas pos la 30ma di mayo 2008 ni ne povas garantiar, ke la dezirata chambri ankore esos disponebla!!

Yen ankore kelka informi pri la Silvio-Gesell-Kunveneyo, l'arivo e la lojig-preci:

La Kunveneyo:
La kunveneyo situesas idilale cirkondante di ruro, foresto e prati.
Hike trovesas loko e tranquileso por vua kunveni, kulturala aranji e.c.
Hike on komune povas projetar la futuro!
Hike on respiras l'aero por experiencar la spirito di chanjo ek funcionanta komunesmo.
Repozar e laborar koncentita…
Komuna tempo en la shirmita atmosfero* dil domo ofras la posibleso di intensa renkontro e reala komunesmo.
Diskursar, diskutar o meditar… kolektar idei e krear nova projeti…
donante la necesa atenco a korpo, spirito ed amno…
En la Silvio-Gesell-kunveneyo grupi povas fortigar la koncieso, ke on komune povas aranjar multo e ke ni kom homi
povas profitar di nia posiblesi di formacado.

Arivo:
Per treno ed autobuso:
de chefa fervoyala staciono Wuppertal

Uzez la autobus-linei 649 (a la direciono Neviges/Velbert) o 647 (a la direciono Neviges/Hattingen) til la
halteyo Kleine Höhe (20 minuti).
Retroirez cirkume 20 metri e voluntez enirar a sinistre aden la Schanzenweg (10 minuti pedvoyo).
Alternante: Uzez la urbala treno (S-Bahn)lineo S9 a la direciono Essen til la halteyo Velbert-Rosenhügel
(Haltepunkt Velbert-Rosenhügel).
Arivante ibe de la direciono Wuppertal Hbf on ja situesas ye la justa latero dil fervoyo.
On devas trapasar la gar-placo til olua sinistra supra fino e pose uzar nefortifikita prato-voyo
til arivo che mikra foresteto.
Esas rekomendita metar ferma shui, se esas mala vetero.
Dop la foresto la voyo esas plu ferma.
Pos cirkume 150 metri on atingas sinistre la forestala voyo a la kunveneyo.
La voyo esas kelke acensanta ed entote havas disto di cirkume 800 metri.

Per automobilo:
Autovoyo A46 inter Düsseldorf e Dortmund, Ekiro Wuppertal-Katernberg.
Vehez a sinistre a la direciono Essen/Neviges (Brillerstr./Nevigeser Str.). Pos cirkume3,5 km
(cirkume 600 m pos Euromaster/Reifen Beeckmann - on ja itere situesas extere dil urbo),
Deturnez avan la autobushalteyo Kleine Höhe (kun suspendita lampo por pediranti)a dextre en la Schanzenweg
e sequez l'indiki a la kunveneyo.
Avan la domo existas bona posiblesi por garar vehili.

Preci:
Lojig-preci po nokto:
• unlita chambro kun dusho e tualeteyo € 43,-
• dulita chambro kun dusho, laveyo e tualeteyo ("Twin"-liti) € 59,-
• dulita chambro kun laveyo e tualeteyo € 55,-
• trilita chambro kun dusho, laveyo e tualeteyo € 79,-
Omna preci inkluzas la legala Germana imposto pri komercado.
La preco anke inkluzas abundanta dejuneto-bufedo.

Anuncformularion, qua anke kontenas l'informi, ad ube sendar ol (postala ed e-postala adresi e faxnumero) esas querebla che
http://www.idolinguo.de/Idorenkontro2008/anuncformulario.pdf

Kordiala saluti a vi omna
Frank Kasper
prezidanto dil Germana Ido-Societo

Til rivido okazione dil Ido-renkontro 2008 en Neviges (Germania)!!!